ຍິນດີຕ້ອນນຮັບທ່ານເຂົ້າສູ່ເວບໄຊສ ຄະນະໂຄສະນາອົບຮົມແຂວງຊຽງຂວາງ                                                                            

ປູກໝາກຄາຍ ເປັນສິນຄ້າ ຄອບຄົວມີລາຍໄດ້ດີ

ປູກໝາກຄາຍ ເປັນສິນຄ້າ ຄອບຄົວມີລາຍໄດ້ດີ

ທ້າວ ຄຳແຫວນ ຢ່າຢົງເຢ້ ອາຊີບຄູສອນ ຢູ່ໂຮງຮຽນ ມ.ສ ຕູ້ຢ່າ, ປັດຈຸບັນ ຢູ່ບ້ານນ້ຳກວາງເມືອງໜອງແຮດ ແຂວງຊຽງຂວາງ ລາວມີພື້ນຖານສືບທອດຈາກການເຮັດໄຮ່, ລ້ຽງສັດນໍາພໍ່ແມ່ຕັ້ງແຕ່ຍັງນ້ອຍ. ຍ້ອນຄວາມດຸໝັ່ນຂະຫຍັນພຽນຂອງລາວ ທັງເປັນຄູສອນ, ທັງທໍາການຜະລິດໄປພ້ອມ ໂດຍຈັດແບ່ງເວລາກ່ອນຈະໄປການ ແລະ ເລີກການ ລາວປູກຫຍ້າລ້ຽງສັດ ເພື່ອສ້າງລາຍຮັບເຂົ້າຄອບຄົວ. ແຕ່ປານນັ້ນລາຍໄດ້ແຕ່ລະປີ ທຽບກັບການໃຊ້ຈ່າຍພຽງແຕ່ພໍກຸ້ມກິນ ແລະ ບາງປີກໍຂາດເຂີນ. ເພາະລາຍຈ່າຍຫຼາຍກວ່າລາຍຮັບ ສະມາຊິກຄອບຄົວ ມີ 6 ຄົນ ຍິງ 4 ຄົນ, ແຮງງານຕົ້ນຕໍມີແຕ່ 2 ຄົນ.

ເມື່ອເປັນແນວນັ້ນ, ລາວໄດ້ປຶກສາຫາລືນຳຫຼາຍຄົນ ທີ່ເຂົາເຈົ້າມີບົດຮຽນໃນການສ້າງເສດຖະກິດຄອບຄົວ ແລະ ນຳມາສົມທຽບກັບຄວາມອາດສາມາດຂອງຄອບຄົວລາວ, ຜ່ານການຄົ້ນຄວ້າໃນຫຼາຍຊ່ອງທາງ ລາວຈຶ່ງສັງເກດເຫັນວ່າໃນແຕ່ລະປີມີພໍ່ຄ້າຄົນຫວຽດນາມມາຊອກຊື້ງ່າຕົ້ນໝາກຄາຍເພື່ອໄປຈໍາໜ່າຍຢູ່ຫວຽດນາມໃນໄລຍະບຸນປີໃໝ່ຂອງເຂົາເຈົ້າ, ອີກປະການໜຶ່ງ ຕົ້ນໝາກຄາຍເປັນໄມ້ໃຫ້ໝາກເຂດໜາວ,ອີງໃສ່ສະພາບພູມສັນຖານ-ພູມອາກາດເມືອງໜອງແຮດແມ່ນເໝາະສົມ ແລະ ຕົ້ນໝາກຄາຍກໍເປັນຕົ້ນໄມ້ພື້ນເມືອງ ທີ່ປະຊາຊົນເມືອໜອງແຮດ ກໍຄືຫຼາຍທ້ອງຖິ່ນພາຍໃນແຂວງຊຽງຂວາງ ເຄີຍປູກມາແຕ່ດຶກດຳບັນ; ບໍ່ພໍທໍ່ໃດປີ ອົງການປົກຄອງເມືອງໜອງແຮດ ໄດ້ຈັດເທດສະການດອກຄາຍຂຶ້ນ ເພື່ອສົ່ງເສີມການທ່ອງທ່ຽວໃນແຕ່ລະປີ ແລະ 5 ປີໃດສະຫຼອງໃຫຍ່ໜຶ່ງຄັ້ງ ຊຶ່ງເປັນກະຕຸກຊຸກຍູ້ໃຫ້ປະຊາຊົນບັນດາເຜົ່າຫັນມາປູກ-ປົກປັກຮັກສາ ແລະ ບົວລະບັດຕົ້ນໝາກຄາຍ ຕິດພັນກັບການທ່ອງທ່ຽວຂອງເມືອງໜອງແຮດ. ເມື່ອເຫັນໄດ້ທ່າແຮງ ແລະ ກາລະໂອກາດຄືແນວນັ້ນ ທ້າວ ຄຳແຫວນຢ່າ ຈຶ່ງຕັດສິນໃຈປູກຕົ້ນຄາຍເພື່ອເປັນສິນຄ້າ. ໃນເບື້ອງຕົ້ນລາວປູກຈໍານວນໜ້ອຍ ຄວບຄູ່ກັບການບົວລະບັດຮັກສາຕົ້ນຄາຍທີ່ມີແລ້ວຢູ່ຕາມສວນໃກ້ເຮືອນ. 2-3 ປີຕໍ່ມາ ເຫັນວ່າມີຫຼາຍຄົນສົນໃຈມາຂໍຊື້, ຈາກນັ້ນ ລາວຈຶ່ງໄດ້ປູກຕາມຂອບເຂດດິນທີ່ໃຊ້ປູກຫຍ້າໃນເມື່ອກ່ອນ. ຮອດປີ 2016 ລາວປູກຕົ້ນຄາຍໄດ້ ຈຳນວນ 415 ຕົ້ນ ໃນເນື້ອທີ່ 2.200 ຕາແມັດ, ມາເຖິງປັດຈຸບັນ ລາວຂະຫຍາຍຕື່ມ 1.200 ຕົ້ນ ໃນເນື້ອທີ່ 8.000 ຕາແມັດ, ໃນນີ້, ຕົ້ນທີ່ສາມາດຕັດງ່າຂາຍໄດ້ ມີ 130 ຕົ້ນ ສະເລ່ຍ 430.000 ກີບ/ຕົ້ນ ລວມເປັນເງິນ 56 ລ້ານກີບ/ປີ. ນອກຈາກການຂາຍງ່າແລ້ວຍັງ ກ້າເບັ້ຍຂາຍໄດ້ປີລະ 2.000 ເບັ້ຍ ລາຄາ 6.000 ກີບ/ເບັ້ຍ ເປັນເງິນ 12 ລ້ານກີບ/ປີ; ລວມລາຍຮັບຈາກການຂາຍງ່າ ແລະ ເບັ້ຍໄດ້ 68 ລ້ານກີບ/ປີ ສະເລ່ຍໃສ່ຄົນໃນຄອບຄົວໄດ້ປະມານ 11 ລ້ານກວ່າກີບ/ຄົນ/ປີແຕ່ລະປີ ໃນໂອກາດທີ່ເມືອງໜອງແຮດຈັດງານເທດສະການດອກຄາຍປະຈຳປີ ລາວໄດ້ຄັດເລືອກຕົ້ນຄາຍທີ່ມີຄວາມງາມທີ່ສຸດໄປຊ່ວຍປະດັບພິທີທາງການ ແລະ ເອົາໄປວາງສະແດງໃຫ້ແຂກໄດ້ຊົມມູນຄ່າບໍ່ຕ່ຳກ່ວາ 2 ລ້ານກີບ/ຄັ້ງ.

ທ້າວ ຄຳແຫວນ ຢ່າຢົງເຢ້ ໄດ້ເລົ່າວິທີການຄັດເລືອກແກ່ນເພື່ອມາກ້າເບັ້ຍເພື່ອເປັນບົດຮຽນໃຫ້ກັບຜູ້ສົນໃຈປູກຕົ້ນໜາກຄາຍວ່າ: ເຖິງລະດູໝາກຄາຍສຸກ ຕ້ອງຄັດເອົາໜ່ວຍທີ່ຕຶງດີ ບໍ່ມີແມງເຈາະ, ແລ້ວນຳມາບົ່ມໃຫ້ເນື້ອເປື່ອຍ ຈາກນັ້ນລ້າງເນື້ອອອກໃຫ້ໝົດ ນຳມາຕາກໃຫ້ແຫ້ງປະມານ 2-3 ມື້ ແລ້ວເກັບຮັກສາໄວ້ ຮອດເດືອນທັນວາ ຫາ ເດືອນມັງກອນ ຈຶ່ງກ້າເບັ້ຍ, ການກ້າເບັ້ຍແມ່ນນຳແກ່ນມາຜ່າກາບແຂງອອກ ເອົາສະເພາະໃນອ່ອນມາກ້າໃສ່ໜານໄລຍະ 15-20 ມື້ ແກ່ນຈະງອກເປັນຈາວອ່ອນ ແລ້ວຈຶ່ງນຳມາໃສ່ເບົ້າຖົງຢາງທີ່ກຽມໄວ້ ຫົດນ້ຳປົກກະຕິແຕ່ບໍ່ໃຫ້ຫົດຫຼາຍເກີນໄປ, ຈາກນັ້ນໃຫ້ສືບຕໍ່ບົວລະບັດຮັກສາ ເມື່ອຕົ້ນຄາຍໃຫຍ່ສູງປະມານ 50-70 ຊມ ສາມາດຍ້າຍອອກໄປປູກໃສ່ຂຸມທີ່ກຽມໄວ້. ຂຸມທີ່ຈະປູກຕ້ອງມີຂະໜາດຢ່າງໜ້ອຍປະມານ 50x50x50 ຊມ, ໃຊ້ຝຸ່ນຄອກປະສົມດິນ; ພາຍຫຼັງປູກແລ້ວ ຕ້ອງຕິດຕາມບໍ່ໃຫ້ສັດຕູພືດທຳລາຍ, ພູນດິນ-ໃສ່ຝຸ່ນຄອກທຸກໆ 6 ເດືອນ ແລະ ຕັດຫຍ້າບໍ່ໃຫ້ຮົກເຮື້ອເພື່ອບໍ່ໃຫ້ແມງໄມ້ທີ່ເປັນສັດຕູພືດລີ້ຊ້ອນ. ເມື່ອຕົ້ນຄາຍໃຫຍ່ຂຶ້ນຕ້ອງມີການຕັດແຕ່ງກິ່ງງ່າ, ການຕັດແຕ່ງກິ່ງງ່າ ແມ່ນເລີ່ມແຕ່ເດືອນມັງກອນຈົນຮອດເດືອນກັນຍາຂອງທຸກປີ ໂດຍການສັງເກດລັກສະນະຂອງງ່າ ແລະ ຕັດແຕ່ງຕາມຄວາມຕ້ອງການຂອງຕະຫຼາດ. ສໍາລັບແນວພັນແມ່ນເລືອກຕົ້ນທີ່ແຂງແຮງມີດອກໃຫຍ່ (ເລືອກໃນລະດູດອກຄາຍບານ). ຮອດປີທີ 3 ຕົ້ນຄາຍຈະສົມບູນພ້ອມທີ່ຈະໃຫ້ດອກ, ໄລຍະນີ້ສາມາດຕັດຈໍາໜ່າຍຕາມທີ່ລູກຄ້າສັ່ງໄດ້ແລ້ວ. ລາວບອກຕໍ່ວ່າ: ຖ້າຄອບຄົວໃດ ຫາກມີເນື້ອທີ່ດິນເໝາະສົມ ແລະ ມີເງື່ອນໄຂກໍໃຫ້ລອງເອົາບົດຮຽນຂອງລາວໄປທົດລອງນຳໃຊ້, ເພາະວ່າຕົ້ນຄາຍແມ່ນພັນໄມ້ພື້ນເມືອງທົນທານຕໍ່ສະພາບແວດລ້ອມ, ຕົ້ນທຶນຕ່ຳ ແລະ ບໍ່ມີຄວາມສ່ຽງໃດໆ, ຂໍພຽງແຕ່ມີຄວາມດຸໝັ່ນຂະຫຍັ່ນພຽນ, ປະຕິບັດຕາມຂັ້ນຕອນໃນການບົວລະບັດຮັກສາແຕ່ເລີ່ມຕົ້ນຈົນເຖິງໄດ້ຮັບຜົນຜະລິດກໍມີລາຍແລ້ວ. ຖ້າຕົ້ນໃດແກ່ກໍຍິ່ງໄດ້ລາຄາສູງໝາຍວ່າຕົ້ນທີ່ຕັດງ່າຂາຍແລ້ວແມ່ນອີກ 3 ປີຕໍ່ໜ້າຈຶ່ງຈະໄດ້ຕັດຂາຍອີກ. ນີ້ຄືຕົວຢ່າງຂອງພະນັກງານຄູ ທີ່ມີຄວາມດຸໜັ່ນ, ຂະຫຍັນພຽນ, ຮູ້ຈັກໝູນໃຊ້ບົດຮຽນການປູກຝັງຈາກພໍ່-ແມ່ໃນອະດີດ,ແບ່ງເວລາຈາກການສິດສອນ ຄວບຄູ່ກັບການຜະລິດກາຍເປັນສິນຄ້າ ວຽກລັດກໍບໍ່ເສຍ, ວຽກເຮືອນກະໄດ້ ເຮັດໃຫ້ຄອບຄົວມີລາຍຮັບດີຂຶ້ນ ສາມາດຫຼຸດພົ້ນອອກຈາກຄວາມທຸກຍາກ ກາຍເປັນຄອບຄົວຕົວແບບດີເດັ່ນປູກໜາກຄາຍເປັນສິນຄ້າພາຍໃນເມືອງ ໜອງແຮດ ແຂວງຊຽງຂວາງ.

ວີດີໂອ....

ເລກໂທ ສຸກເສີນ

ແຈ້ງໄຟໄໝ້:   1119
ຕຳຫຼວດ:       1191
ລົດໂຮງໝໍ:    1195
ໄຟຟ້າ:          1199
ນໍ້າປະປາ:      1169

                                                           

 

               

 

ຈຳນວນຄົນອອນໄລ໌ທ

ມີ 37  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ:

127722
ມື້ນີ້ມື້ນີ້33
ມື້ວານນີ້ມື້ວານນີ້50
ອາທິດນີ້ອາທິດນີ້459
ເດືອນນີ້ເດືອນນີ້1285
ທັງໝົດທັງໝົດ127722