ກອງໂຄສະນາເຄື່ອນທີ່ ເຄື່ອນໄຫວສາຍຟີມມູນເຊື້ອປະຫວັດສາດສໍາຄັນຂອງພັກ, ຂອງຊາດ ແລະ ສາລະຄະດີ ຢູ່ເມືອງໝອກ

ລາຍລະອຽດ

ສ້າງຂື້ນເມື່ອ ວັນພຸດ, 28 ກັນຍາ 2022 02:06

ຂຽນໂດຍ ຄອຂ ຊຽງຂວາງ

                       ເມື່ອ​ບໍ່​ດົນ​ມາ​ນີ້ ຄະນະ​ໂຄສະນາ​ອົບຮົມ​ແຂວງ ນໍາ​ໂດຍ ທ່ານ ວັນນະ​ສິນ ຜະ​ລີ​ຈັນ ຮອງ​ຫົວໜ້າ​ຄະນະ​ໂຄສະນາ​ອົບຮົມ​ແຂວງ ພ້ອມ​ດ້ວຍ​ທີ​ມງານຄະນະ​ໂຄສະນາ​ອົບຮົມ​ແຂວງ ສົມທົບ​ກັບ​ ຄະນະ​ໂຄສະນາ​ອົບຮົມ​ເມືອງ​​ໝອກ ໄດ້ນໍາ​​ເອົາ​ກອງ​ໂຄສະນາ​ເຄື່ອນ​ທີ່​ລົງ​ສາຍ​ຟີມມູນ​ເຊື້ອ​ຂອງ​ພັກ, ຂອງ​ຊາດ ​ແລະ ສາລະ​ຄະດີ​ຕ່າງໆຢູ່​ບ້ານ​​ລຽບ​ຕາມ​ຊາຍ​ແດນ ລາວ-ຫວຽດນາມ​​ຄື: ນໍ້າ​ຫງາດ ​ແລະ ບ້ານ​ສາມ​​ແຈ 1 ​ເມືອງ​ໝອກ ​ແຂວງ​ຊຽງຂວາງ. ​​ໂດຍມີພໍ່​ແມ່​ປະຊາຊົນ, ບັນດາ​ນ້ອງ​ໆນັກຮຽນ, ຊາວ​ໜຸ່ມ, ​ເຍົາວະ​ຊົນຂອງ​ສອງ​ບ້ານເຂົ້າ​ຮ່ວມ​ຊົມປະມານ 300 ກ່ວາຄົນ.

​       ​ຈຸດປະສົງ​ໃນການ​ລົງ​ເຄື່ອນ​ໄຫວ​ໃນ​ຄັ້ງນີ້​​​ແມ່ນ​ເພື່ອ​ຈັດ​ຕັ້ງ​ປະຕິບັດ​ຕາມ​ແຈ້ງ​ການ​ແນະ​ນໍາ​ຂອງ ຄະນະ​ໂຄສະນາ​ອົບຮົມ​ສູນ​ກາງ​ພັກ ສະບັບ​ເລກທີ 23/ຄອສພ ​ແລະ ຄໍ​າ​ແນະ​ນໍາ​ຂອງ ​ຄະນະ​ປະ​ຈໍາ​ພັກ​ແຂວງ ສະບັບ​ເລກທີ 07/ຄປພຂ, ລົງ​ວັນ​ທີ 28 ມິຖຸນາ 2022 ວ່າ​ດ້ວຍ​ການຈັດ​ຕັ້ງ​ໂຄສະນາ-ປາຖະກະຖາ ປີ​ສາມັກຄີ​ມິດຕະພາບ​ການ​ຮ່ວມ​ມື ລາວ - ຫວຽດນາມ ຄົບຮອບ 45 ​ແລະ ວັນ​ສ້າງ​ຕັ້ງ​ສາຍ​ພົວພັນ​ການ​ທູ​ດ​ ລາວ - ຫວຽດນາມ ຄົບຮອບ 60 ປີ. ​ເພື່ອ​ເຮັດ​ໃຫ້ການຈັດ​ຕັ້ງ​ປະຕິບັດການໂຄສະນາ​ສຶກສາ​ອົບຮົມ, ການ​ເຮັ​ດວຽກງານ​ການ​ເມືອງ​-ແນວ​ຄິດກັບ​ການຈັດ​ຕັ້ງ​ປະຕິບັດ ການ​ຜັນ​ຂະຫຍາຍ 2 ວາລະ​ແຫ່ງ​ຊາດຄື​ການ​ແກ້​ໄຂ​ຄວາມ​ຫຍຸ້ງ​ຍາກ​ດ້ານ​ເສດຖະກິດ​ການ​ເງິນ ​ແລະ ບັນຫາ​ຢາ​ເສບ​ຕິດ​ໃຫ້​ຖືກຕ້ອງ​ຕາມ​ແນວທາງ​ຂອງ​ພັກ ​ແລ​ະ ນະ​ໂຍບາຍ​ຂອງ​ລັດຖະບານໃຫ້ມີ​ຫຼາຍ​ຮູບ​ຫຼາຍ​ສີ, ຫຼາຍ​ແບບ, ​ມີເນື້ອ​ໃນ​​ເລິກ​ເຊິ່ງ ​ແລະ ທົ່ວ​ເຖິງ​ທຸກ​ເປົ້າ​ໝາຍ​ນັ້ນ​ ຄະນະ​ໂຄສະນາ​ອົບຮົມ​ແຂວງ (ກອງ​ໂຄສະນາ​ເຄື່ອທີ່)​ຈຶ່ງ​ໄດ້​ສ້າງ​ແຜນ​ເຄື່ອນ​ໄຫວ​ລົງ​ສາຍ​ຟີມ​ມູນ​ເຊື້ອ​ຂອງ​ພັກ, ຂອງ​ຊາດ ​ແລະ ສາລະ​ຄະດີ​ຕ່າງໆ​ຢູ່​ບ້ານ​ລຽບຕາມ​ຊາຍ​ແດນ ລາວ-ຫວຽດນາມ. ເນື້ອ​ໃນ​ໃນການລົງໂຄສະນາ​​ຄັ້ງ​ນີ້​​ແມ່ນ​ໄດ້​ສາຍ​ຟີ​ມ ວິລະ​ກໍາ​ແຫ່ງ​ສາຍ​ພົວພັນ​ຮ່ວມ​ມືຮອບ ລາວ - ຫວຽດນາມ, ຜົນ​ສໍາ​ເລັດ​ຂອງ​ການ​ກໍ່ສ້າງ​ເສັ້ນທາງລົດ​ໄຟ​ລາວ-ຈີນ, ຜົນ​ຮ້າຍ​ຂອງ​ຢາ​ເສບ​ຕິດ ​ແລະ ສາລະ​ຄະດີ​ກ່ຽວກັບ​ການຕ້ານ​ການ​ຄ້າ​ມະນຸດ, ກອງພັນ​ທີ່ 2 ຜ່າ​ວົງ​ປິດ​ລ້ອມ​ຂອງ​ສັດຕູ ​ທີ່​ທົ່ງ​ໄຫ​ຫີນ​ຊຽງຂວາງ ນີ້ກໍ່​ເພື່ອ​ເຮັດ​ໃຫ້ພໍ່​ແມ່​ປະຊາຊົນ​, ຊາວ​ໜຸ່ມ, ​ເຍົາວະ​ຊົນ​ ໄດ້ຮັບ​ຮູ້​​ເຂົ້າ​ໃຈ​ເຖິງມູນ​ເຊື້ອ​ແຫ່ງ​ສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່​, ຄວາມ​ສາມັກຄີ​​ແບບພິ​ເສດ ​ແລະ ການ​ຮ່ວມ​ມື​ຮອບດ້ານລະ​ຫ່ວາງ​ສອງ​ພັກ​ກໍ່​ຄື​ສອງ​ລັດຖະບານ ລາວ ​ແລະ ຫວຽດນາມ ​ເພື່ອ​ເປັນ​ການ​ຈາລຶກ​ຄຸນ​ງາມ​ຄວາມ​ດີ​ຂອງ​ພັກ-ລັດ ​ແລະ ປະຊາຊົນ​ຫວຽດນາມ​ອ້າ​ຍນ້ອງ​ທີ່​ໄດ້​ຊ່ວຍ​ເຫຼືອ​ອັນ​​ໃຫຍ່​ຫຼວງ ​ແລະ ລໍ້າ​ຄ່າ​ໃນ​ໄລຍະ​ຕໍ່ສູ້​ປົດ​ປ່ວຍ​ຊາດ ກໍ​ຄື​ພາລະກິດ​ແຫ່ງ​ການ​ປົກ​ປັກ​ຮັກ​ສາ ​ແລະ ສ້າງສາ​ພັດທະນາ​ປະ​ເທດ ສປປ ລາວ ທັງ​ເປັນ​ການ​ປຸກລະດົມ​​ປະຊາຊົນ​ບັນດາ​ເຜົ່າທີ່ຢູ່​ລຽບ​ຕາມ​ຊາຍ​ແດນ ລາວ ​- ຫວຽດນາມ​ຈົ່ງ​ເພີ່ມ​ຄວາມ​ສາມັກຄີ​ຮັກ​ແພງ​ຊ່ວຍ​ເຫຼືອ​ເຊິ່ງກັນ ​ແລະ ກັນຕະຫຼອດ​ໄປ, ​ເຫັນໄດ້ຜົນ​ສໍາ​ເລັດ​ໃນ​ການ​ກໍ່​ສ້າງ​ເສັ້ນທາ​ງລົດ​ໄຟ​ຈາກ ສປ ຈີນ ສູ່ ສາທາລະນະ​ລັດ ປະຊາ​ທິ​ປະ​ໄຕ ປະຊາຊົນ​ລາວ; ​ແມ່ນຍຸດ​ທະ​ສາດ​ແຫ່ງ​ການ​ພັດທະນາ​ປະ​ເທດ​ຊາດໃຫ້ຫລຸດພົ້ນອອກຈາກສະຖານະພາບດ້ວຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມຂອງ​ພັກ​ເຮົາ, ​ປຸກລະດົມ​ໃຫ້​ພໍ່​ແມ່​ປະຊາຊົນ, ຊາວ​ໜຸ່ມ​, ເ​ຍົາ​ວະ​ຊົນຈົ່ງ​​ເຊີດ​ຊູນໍ້າ​ໃຈ​ຮັກ​ຊາດ, ຮັກ​ບ້ານ​ເກີດ​ເມືອງ​ນອນ, ​ເຫັນ​ໄດ້ຜົນ​ຮ້າຍ​ຂອງ​ຢາ​ເສບຕິດ​​ທີ່​ມີ​ຕໍ່​ຊີວິດ​ຮ່າງ​ກາຍ ​ແລະ ​ຫ່າງໄກຈາກສິ່ງເສບຕິດຕ່າງໆ​ເພື່ອ​​ເຮັດໃຫ້​ສັງຄົມມີຄວາມ​ສະ​ຫງົບຫຼີກ​ລຽງຈາກ​ການ​​ເກີດ​ມີ​ການຂີ້ລັກງັກ​ແງະ​, ການອາ​ລະວາ​ດຕີ​ກັນ ​ພ້ອມ​ທັງ​ເປັນ​ການ​ປຸກລະດົມ​ທຸກ​ຊັ້ນ​ຄົນ​​ໃນສັງຄົມຈົ່ງ​ເປັນ​ເຈົ້າ​ການ​ໃນ​ການ​ປະຕິບັດ​ 2 ວາລະ​ແຫ່ງ​ຊາດ​ໃນ​ການ​ແກ້​ໄຂ​ບັນ​ຫາ​ຢາ​ເສບ​ຕິດ​ໃຫ້​ໝົດ​ໄປຈາກ​ສັງຄົມເທື່ອ​ລະ​ກ້າວ. ນອກ​ນີ້ ​ຍັງປຸກລະດົມເຮັດ​ໃຫ້​ບັນດານ້ອງໆ​ນັກ​ຮຽນ, ຊາວ​ໜຸ່ມ​, ເ​ຍົາ​ວະ​ຊົນ ​ເຫັນ​ໄດ້ຜົນ​ຮ້າຍ​ຂອງ​ການ​ຄ້າ​ມະນຸດ ​​ເພື່ອ​ເປັນ​ບົດຮຽນ, ​ເປັນ​ຄະຕິ​ເຕືອນ​ໃຈ ​​ບໍ່​ໃຫ້​ຕົກ​ເປັນ​ເຫຍື່ອ​ຂອງ​ກຸ່ມ​ຄົນ​ທີ່​ບໍ່​ຫວັງ​ດີ​ໃນ​ການ​ຕົວະ​ຍົວະ​ຫຼອກ​ລວງ​ໃຫ້​ໄປ​ເປັນ​ຜູ້​ຖືກຄ້າ​ມະນຸດ ​ເພາະ​ການ​ຄ້າ​ມະນຸດ ​ແມ່ນ​ບັນຫາ​ອາ​ຊະຍະ​ກໍາ​ທີ່​ເກີດ​ຂຶ້ນຢ່າງ​ກວ້າງຂວາງຢູ່​ໃນທົ່ວ​ສັງຄົມ​ລາວກໍ່​ຄື​ແຂວງ​ຊຽງຂວາງ​ຂອງ​ພວກ​ເຮົາ​ເປັນ​ຕົ້ນ​ແມ່ນ​ແມ່ຍິງ ​ແລະ ​ເດັກນ້ອຍທີ່ຢູ່​ໃນ​ເຂດ​ຊົນນະບົດ​​ຜູ້ທີ່ຮູ້ເທົ່າບໍ່ເຖິງການ.

​ກາ​ນນໍາ​ເອົາ​ກອງ​ໂຄສະນາ​ເຄື່ອນ​ທີ່​ລົງ​ສາຍ​ຟີມ​ມູນ​ເຊື້​ອການພົວພັນຮ່ວມມື ​ແລະ ສາລະ​ຄະດີ​ຕ່າງໆນັ້ນ; ມັນ​​ກໍ່​ເປັນຮູບ​ການ​ໂຄສະນາສຶກສາອົບຮົມວຽກງານ​ການ​ເມືອງ​-​ແນວ​ຄິດທີ່​ສໍາຄັນອັນ​ໜຶ່ງ ​ເຊິ່ງສາມາດເຮັດ​​ໃຫ້​ຜູ້​ຊົມ​ ໄດ້​​ສໍາ​ພັດ​ດ້ວຍ​ຕາ, ​ເຂົ້າ​ໃຈງ່າຍ, ເປັນ​ການ​ໂຄສະນາສຶກສາ​ອົບຮົມໃຫ້ພໍ່​​ແມ່​ປະຊາຊົນ, ຊາວ​ໜຸ່ມ, ​ເຍົາ​ວະຊົນ ​ໄດ້​ຮັບຮູ້​​ເຂົ້າ​ໃຈຕໍ່ການ​ຊີ້​ນໍາ-ນໍາພາ​ຂອງ​ພັກ​ເຮົາ​​ໃນ​ໄລຍະ​​​ໃໝ່, ​ເຂົ້າ​ໃຈຕໍ່​ແນວທາງນະ​ໂຍບາຍຂອງ​ພັກ, ກົດໝາຍ​ຂອງ​ລັດ, ບັນຫາອາຊະຍະກໍາຕ່າງໆທີ່ເກີດຂຶ້ນໃນທົ່ວສັງຄົມ, ເປັນການໂຄສະນາ-ປຸກລະດົມໃຫ້ທົ່ວສັງຄົມ ຈົ່ງພ້ອມກັນຕ້ານ, ສະກັດກັ້ນ ແລະ ແກ້ໄຂບັນຫາປະກົດ​ການ​ຫຍໍ້​ທໍ້ໃຫ້ໝົດໄປຈາກສັງຄົມເຮົາ​ເທື່ອລະກ້າວ ແລະ ຈົ່ງພ້ອມກັນ​ສ້າງສາ​ພັດທະນາ​ປະ​ເທດ​ຊາດ​ໃຫ້​ຫຼຸດພົ້ນອອກຈາກຄວາມດ້ອຍພັດທະນາ.

                                                                                                                                                    (ຂ່າວ: ນູຢ່າງ ຢົງ​ມາ)

• < ຕໍ່ໄປ
• ຕໍ່ໄປ >