ປະທານປະເທດເນັ້ນວຽກງານ 3 ສ້າງ ໃນຕໍ່ໜ້າ...

ສ້າງຂື້ນເມື່ອ ວັນພຸດ, 26 ພະຈິກ 2014 06:58

      ປະທານ​ປະເທດເນັ້ນວຽກງານ 3 ສ້າງ ໃນຕໍ່ໜ້າຕ້ອງເອົາໃຈໃສ່ບາງວຽກພື້ນຖານ.

   ທ່ານ​ປະທານ​ປະ​ເທດ ຈູມ​ມະ​ລີ​ ໄຊ​ຍະ​ສອນ ​ໄດ້​ມີ​ຄຳ​ເຫັນ​ຊີ້ນຳກອງ​ປະຊຸມສະຫຼຸບຕີ​ລາຄາ ຖອດ​ຖອນ​ບົດຮຽນການ​ເຮັດ​ທົດ​ລອງ​ວຽກ ງານ​ 3 ສ້າງ ​ໃຫ້​ເອົາ​ໃຈ​ໃສ່​ປະຕິບັດ​ວຽກງານ ພື້ນຖານ​ຈຳນວນໜຶ່ງ​​ເປັນຕົ້ນ​: ຕ້ອງ​ບຸກທະລຸ​ດ້ານ​ຈິນຕະນາການ, ສິ່ງ​ທີ່​ຈຳ​ເປັນ​ທີ່​ສຸດ​

ແມ່ນ​ຕ້ອງ​ເຮັດ​ໃຫ້​ຖັນ​ແຖວ​ກາ​ນນຳ, ສະ​ມາ​ຊິກ​ພັກ, ພະນັກງານ​ໃຫ້​ມີ​ຄວາມ​ເຂົ້າ​ໃຈ​ເລິກ​ເຊິ່ງ​ເຖິງ​ຄວາມ​ຈຳ​ເປັນ​ພາວະ​ວິ​ໄສ​ຂອງ​ວຽກງານ​ 3 ສ້າງ, ສຸມ​​ໃສ່​ດຳ​ເນີນ​ກອງ​ປະຊຸມ​ອົງຄະ​ນະ​ພັກຂັ້ນ​ເມືອງ ​ໃຫ້​ສຳ​ເລັດ​ແລ້ວ​ສືບຕໍ່ຂັ້ນ​ແຂວງ ​ແລະ ສູນ​ກາງ ​ໂດຍ​ເອົາ​ໃຈ​​ໃສ່ ຜັນ​ຂະຫຍາຍ​ວຽກງານ 3 ສ້າງ​ເ​ຂົ້າ​ໃນ​ລາຍ​ງານ​ການ​ເມືອງ ກໍຄື​ແຜນ​ພັດທະນາ​ເສດຖະກິດ-​ສັງຄົມ ​ແລະ ວຽກງານ​ບຸກຄະລາ​ກອນ, ຕໍ່ໜ້ານີ້​ແມ່ນ​ໄລ​ຍະ​ກະກຽມສະຫຼຸບການ​ປະຕິບັດ​ແຜນການ​ພັດທະນາ​ເສດຖະກິດ​-ສັງຄົມ 5 ປີ​ຄັ້ງທີ VII, ກຽມວິ​ໄສ​ທັດ​ຮອດ​ປີ 2030 , ຍຸດ​ທະ​ສາ​ດພັດທະນາ​ໄລຍະ 10 ປີ, 2016-2025 ແລະ ແຜນພັດທະນາ 5 ປີ ຄັ້ງທີ 8 ໃຫ້ແທດເໝາະທ່າແຮງ ແລະ ຄວາມສາມາດບົ່ມຊ້ອນຂອງປະເທດເຮົາ.

     ສຳລັບການສ້າງແຂວງເປັນຫົວໜ່ວຍຍຸດທະສາດ, ຕ້ອງສ້າງໃຫ້ມີພື້ນຖານດ້ານເສດຖະກິດທີ່ເຂັ້ມແຂງ ບໍ່ພຽງແຕ່ສາມາດກ້າວຂຶ້ນກຸ້ມຕົນເອງດ້ານການເງິນເທົ່ານັ້ນ, ແຕ່ຍັງຕ້ອງດຸ່ນດ່ຽງໃຫ້ສູນກາງນຳອີກ ເພື່ອໃຫ້ສູນກາງມີກຳລັງແຮງປະຕິບັດຍຸດທະສາດລວມຂອງຊາດ, ການສ້າງຕັ້ງສະພາປະຊາຊົນຂັ້ນທ້ອງຖິ່ນ ກໍເປັນສິ່ງສຳຄັນໃນທິດການສ້າງແຂວງໃຫ້ເປັນຫົວໜ່ວຍຍຸດທະສາດ ເພື່ອເສີມກຳລັງແຮງສັງລວມຂອງການຈັດຕັ້ງທ້ອງຖິ່ນ, ສ່ວນການສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ຜ່ານມາຖືວ່າຍັງບໍ່ທັນມີບົດຮຽນຫຼາຍ, ແຕ່ຕ້ອງປັບປຸງຍົກສູງຄວາມສາມາດນຳພາຮອບດ້ານຂອງຄະນະພັກເມືອງ ໄປຄຽງຄູ່ກັບການບໍລິຫານລັດ ແລະ ການຄຸ້ມຄອງເສດຖະກິດ-ສັງຄົມ ຂອງເມືອງ, ກຳນົດແຜນພັດທະນາເສດຖະກິດ-ສັງຄົມ ໂດຍອີງໃສ່ທ່າແຮງ ແລະ ຄວາມສາມາດບົ່ມຊ້ອນຂອງເມືອງ ທັງມີແຜນສ້າງສາຍພົວພັນດ້ານເສສຖະກິດກັບເມືອງອື່ນໆພາຍໃນແຂວງ ລວມກັບຕ່າງປະເທດເພື່ອຊຸກຍູ້ ການຜະລິດເປັນສິນຄ້າ ໃຫ້ແຂງແຮງຕິດພັນກັບອຸດສາຫະກຳປຸງແຕ່ງ ແລະ ການຕະຫຼາດທີ່ໝັນທ່ຽງ. ການສ້າງບ້ານເປັນຫົວໜ່ວຍພັດທະນາ ໃຫ້ດຳເນີນການຕິດພັນກັບວຽກງານ 3 ສ້າງ ໂດຍມີການຖອດຖອນບົດຮຽນການທົດລອງຢູ່ 109 ບ້ານເປົ້າໝາຍ ທີ່ເຫັນວ່າມີຜົນສຳເລັດ ເພື່່ອເປັນຕົວແບບຂະຫຍາຍໄປສູ່ບ້ານອື່ນໆ.

     ທ່ານປະທານປະເທດ, ໄດ້ຢ້ຳໃຫ້ຄະນະຮັບຜິດຊອບ 3 ສ້າງແຕ່ລະຂັ້ນເອົາໃສ່ຕິດຕາມການເຄື່ອນໄຫວຢູ່ບັນດາເມືອງ ແລະ ບ້ານເປົ້າໝາຍເພື່ອປະເມີນຜົນ ຊອກໃຫ້ເຫັນປັດໄຈ ແລະ ໜໍ່ແໜງໃໝ່ທີ່ກ້າວໜ້າ ນຳມາເປັນບົດຮຽນໃນການປະຕິບັດວຽກງານ 3 ສ້າງໃຫ້ເໝາະສົມ.

       ການປະຕິບັດວຽກງານສາມສ້າງແຕ່ນີ້ຮອດທ້າຍປີ 2015 ຕ້ອງໃຫ້ຕິດແໜ້ນກັບການຊຸກຍູ້ຂະ ບວນການຕ່າງໆ ຢ່າງຟົດຟຶ້ນຕໍ່ເນື່ອງ ເພື່ອຄຳນັບຮັບຕ້ອນວັນສຳຄັນຂອງຊາດ ແລະ ກອງປະຊຸມໃຫ່ຍຄັ້ງທີ X ຂອງ​ພັກ ​ເຮັດ​ໃຫ້​ທົ່ວ​ປະ​ເທດ​ມີ​ສະຖຽນລະ​ພາບ​ທາງ​ດ້ານ​ການ​ເມືອງ, ມີ​ຄວາມ​ເປັນ​ລະບຽບຮຽບຮ້ອຍ ​ແລະ ມີ​ຄວາມ​ສະຫງົບ​ປອດ​ໄພ​ຢ່າງໜັກ​ແໜ້ນ.